მამუკა ბახტაძემ ფისკალურ პარამეტრებსა და გასული წლის სახელმწიფო ბიუჯეტის შესრულების მაჩვენებელზე ისაუბრა

2017 წელი მნიშვნელოვანი დადებითი დინამიკით ხასიათდებოდა, რაც გამოხატა მაკროეკონომიკურ პარამეტრებში, - ამის შესახებ ფინანსთა მინისტრმა, მამუკა ბახტაძემ დღეს გამართულ ბრიფინგზე განაცხადა.

ფინანსთა სამინისტროს ცნობით, ბახტაძემ 2017 წლის ფისკალური წელი შეაჯამა და მიღწეულ ფისკალურ პარამეტრებსა და გასული წლის სახელმწიფო ბიუჯეტის შესრულების მაჩვენებელზე ისაუბრა.

როგორც მან აღნიშნა, დადებითია დინამიკა ისეთ მაკროეკონომიკურ პარამეტრებში როგორიცაა დაგეგმილთან მიმართებაში მაღალი ეკონომიკური ზრდა, მიმდინარე ანგარიშის დეფიციტის კლების ტენდენცია, ექსპორტის ზრდის მაღალი მაჩვენებელი როგორც სასაქონლო ისე მომსახურების სფეროში,  რაც მისივე თქმით, მნიშვნელოვანწილად, განპირობებულია ეკონომიკურ ზრდაზე ორიენტირებული ფისკალურ პოლიტიკით.

ბახტაძის განცხადებით, 2017 წლის ბიუჯეტში აისახა თვისობრივად გარდაქმნილი ფისკალური პოლიტიკა, რომელიც ითვალისწინებდა ინვესტიციების ზრდას ინფრასტრუქტურულ პროექტებში, ადმინისტრაციული ხარჯების ოპტიმიზაციას და ეკონომიკური ზრდაზე ორიენტირებული საგადასახადო სისტემის შექმნას. მინისტრის თქმით, რეფორმამ მნიშვნელოვანი რესურსი შექმნა კერძო სექტორის განვითარებისთვის და ახალი სამუშაო ადგილების შესაქმნელად.

მან ასევე აღნიშნა, რომ ფისკალურ პოლიტიკაში განხორციელებული რეფორმების პაკეტი, საფუძვლად დაედო საერთაშორისო სავალუტო ფონდთან 2017 წელს მიღწეულ შეთანხმებას ახალი, 285 მლნ დოლარის მოცულობის პროგრამაზე „გაფართოებული დაფინანსების მექანიზმის" (EFF) ფარგლებში, რომელის პირველი მიმოხილვა წარმატებითაა დასრულებული.