„საქართველოს ბანკის“ მხარდაჭერით, Impact Hub Tbilisi საერთაშორისო სტუდენტურ პროგრამას Social Impact Award იწყებს

Impact Hub Tbilisi საერთაშორისო სტუდენტურ პროგრამას Social Impact Award იწყებს.

პროგრამის გახსნითი ღონისძიება დღეს „ფაბრიკაში“ გაიმართა.

Social Impact Award (სია) არის ყველაზე მასშტაბური სტუდენტური პროგრამა სოციალური მეწარმეობის მიმართულებით, რომელიც 25 ქვეყანაში ერთობლივად ხორციელდება. პროგრამა ორიენტირებულია სტუდენტების განათლებაზე  სოციალური მეწარმეობის დარგში და  ახალგაზრდებს სთავაზობს ათთვიან საგანმანათლებლო კურსს თავიანთი  იდეების განსახორციელებლად. პროგრამა მოიცავს  ვორქშოფებს, ფინალისტი გუნდების  ორთვიან  ინკუბაციას და Social Impact Award-ის საერთაშორისო სამიტს. Social Impact Award-ის პარტნიორია საქართველოს ბანკი. აღნიშნული თანამშრომლობა გასულ წელს შედგა და მიმდინარე წელსაც წარმატებით გრძელდება.

„საქართველოს ბანკი Social Impact Award-ის მხარდამჭერია უკვე მეორე წელია, დაწყების დღიდან ამ პროექტს მხარში ვუდგავართ, რადგანაც Social Impact Award ეხმარება სოციალურ მეწარმეებს, ხოლო ჩვენ სტრატეგიულად უკვე ვეხმარებით მათ. 2 წლის განმავლობაში დავაფინანსეთ 10-ზე მეტი  სოციალური სტარტაპი. საერთო  ჯამში, 500  000 ლარზე მეტი ჩაიდო მათ განვითარებაში.მიგვაჩნია, რომ სოციალური მეწარმეობა მნიშვნელოვანი სტრატეგიული მიმართულებაა, რადგან ის ხელს შეუწყობს, როგორც სოციალური აქტივობების გაძლიერებას, ასევე ქვეყნის ეკონომიკურ განვითარებას“,-განაცხადა „საქართველოს ბანკის“ სოციალური მიმართულების ხელმძღვანელმა  ბორის კიკნაძემ.

2018 წელს პროგრამა ფართოვდება, ვორქშოფები ჩატარდება საქართველოს რამდენიმე ქალაქში (თბილისი, თელავი, რუსთავი). გარდა ამისა, Impact Hub Tbilisi -მა მოიპოვა სიას საერთაშორისო სამიტის  მასპინძლობის  ლიცენზია, რომელიც გაიმართება 2018 წლის ნოემბერში. სამიტში მონაწილეობას მიიღებს ყველა ქვეყნის გამარჯვებული გუნდი, რაც  ნიშნავს 200-მდე ახალგაზრდა მეწარმეს მსოფლიოს სხვადასხვა ქვეყნიდან.

„Impact Hub Tbilisi   პროგრამა Social Impact Award-ის საშუალებით ახალგაზრდებს აძლევს შესაძლებლობას, წამოიწყონ სოციალური ბიზნესი. პროგრამის განმავლობაში სტუდენტები გადიან მთელ პროცესს იდეის  გენერირებიდან, ბიზნესგეგმის შედგენამდე. წელს მნიშვნელოვანი სიახლე გვაქვს, ვმასპინძლობთ პროგრამის საერთაშორისო სამიტს, რომლის ფარგლებშიც  ნოემბერში საქართველოს ეწვევა 200-მდე ახალგაზრდა  სოციალური მეწარმე მსოფლიოს სხვადასხვა ქვეყნიდან. ეს ღონისძიება იქნება ჩვენი ქვეყნისთვის  მნიშვნელოვანი მოვლენა, რადგან გვექნება შესაძლებლობა, გავიზიაროთ საერთაშორისო გამოცდილება სოციალური მეწარმეობის კუთხით“,-აღნიშნა Impact Hub Tbilisi -ის თანადამფუძნებელმა ქეთი ებანოიძემ.

Impact Hub Tbilisi-მა საქართველოში  პროგრამის  განხორციელების ლიცენზია 2017 წელს მიიღო.

გასულ წელს ვორქშოფები ჩატარდა თბილისსა და თელავში, დაესწრო 200-მდე სტუდენტი. საბოლოოდ გამოვლინდა სამი გამარჯვებული გუნდი, სამივე ძალიან აქტუალურ სოციალურ თემას ეხმაურება და მათი გადაჭრის ინოვაციურ გზებს გვთავაზობს.

®