სებ-ის პროგნოზით, რეალური მშპ 2017 წელს 4%-ით გაიზრდება

საქართველოს ეროვნული ბანკის პროგნოზით, რეალური მთლიანი შიდა პროდუქტი 2017 წელს 4%-ით გაიზრდება.

იმავე პროგნოზით, წინა პერიოდთან შედარებით შემცირებულია უარყოფითი რისკ ფაქტორები და თუ საგარეო ფაქტორების გაუმჯობესების მიმდინარე ტენდენცია შენარჩუნდება, მოსალოდნელია, რომ მშპ ზრდამ 2017 წელს 4%-ს გადააჭარბოს.

„მშპ–ს ზრდაში მნიშვნელოვანი წვლილი ექნება მოხმარებასა და ინვესტიციებს, რასაც საგარეო შემოდინებები, დაგეგმილი ფისკალური სტიმული და ბიზნეს განწყობის გაუმჯობესება განაპირობებს. იმავდროულად, მოსალოდნელია, რომ 2017 წელს მშპ-ს ზრდაში პოზიტიური წვლილი ექნება წმინდა ექსპორტს. მიუხედავად აღნიშნული გაუმჯობესებისა, არსებული შეფასებით, ერთობლივი გამოშვება ჯერ კიდევ ჩამორჩება მის პოტენციურ დონეს. პროგნოზის მიხედვით, აღნიშნული ჩამორჩენა 2018 და 2019 წლებში ეტაპობრივად აღმოიფხვრება.

2017 წლის მეორე კვარტალში პროგნოზის შესაბამისად გაიზარდა წლიური ინფლაციის მაჩვენებელი და ივნისში 7.1% შეადგინა. ინფლაციის მაჩვენებელზე ზრდის მიმართულებით იმოქმედა ერთჯერადმა ფაქტორებმა. კერძოდ, სამომხმარებლო ფასებზე აისახა აქციზის გადასახადების ზრდა და ასევე, საერთაშორისო ბაზრებზე ნავთობისა და სურსათის სასაქონლო ჯგუფებზე ფასების მატება. აღნიშნული დროებითი ფაქტორების გავლენა ინფლაციის წლიურ მაჩვენებელზე 2017 წლის ბოლომდე შენარჩუნდება. საქართველოს ეროვნული ბანკის პროგნოზით, დროებითი ფაქტორების ამოწურვასთან ერთად ინფლაცია შემცირდება და 2018 წელს 3%-იანი მიზნობრივი მაჩვენებლის ქვემოთ შენარჩუნდება. ინფლაციას შემცირებისკენ უბიძგებს ერთობლივი მოთხოვნაც, რადგან ეკონომიკური აქტივობა, გაუმჯობესების მიუხედავად, ჯერ კიდევ ჩამორჩება მის პოტენციურ დონეს. საშუალოვადიან პერიოდში ინფლაციაზე მოქმედი შოკები განეიტრალდება და ინფლაცია მიზნობრივი მაჩვენებელის ფარგლებში შენარჩუნდება.

უნდა აღინიშნოს, რომ მონეტარული პოლიტიკის მიზანი ვერ იქნება ინფლაციაზე მოქმედი მოკლევადიანი და ერთჯერადი ფაქტორების სრულად განეიტრალება. აღნიშნული შესაძლებელი იქნებოდა მხოლოდ ეკონომიკური ზრდის მკვეთრად შემცირებისა და უმუშევრობის ზრდის ხარჯზე. ამდენად, ეროვნული ბანკი, მონეტარული პოლიტიკის დადგენისას ცდილობს, დაბალანსებული იყოს არჩევანის გაკეთებისას: ერთი მხრივ, რამდენად სწრაფად დაუბრუნდება ინფლაცია მიზნობრივ დონეს და, მეორე მხრივ, როგორი გავ¬ ლენა ექნება ეკონომიკურ ზრდაზე. ინფლაციური მოლოდინების მოსათოკად, ეროვნულმა ბანკმა მეორე კვარტალში მონეტარული პოლიტიკის გა¬ ნაკვეთი 7.0%-მდე გაზარდა. მიმდინარე მაკროეკონომიკური პროგნოზის შესაბამისი მონეტარული პოლიტიკის საპროცენტო განაკვეთის მოსალოდნელი ტრაექტორიის მიხედვით, სხვა თანაბარ პირობებში, ინფლაციაზე მოქმედი ერთჯერადი ფაქტორების ამოწურვასთან ერთად, მოსალოდნელია, რომ საშუალოვადიან პერიოდში მონეტარული პოლიტიკის განაკვეთი ეტაპობრივად შემცირდება ნეიტრალურ დონემდე“,-ნათქვამია საქართველოს ეროვნული ბანკის  2017 წლის მონეტრული პოლიტიკის ანგარიშში.

აქვე განმარტებულია, რომ მონეტარული პოლიტიკის განაკვეთის პროგნოზი არ წარმოადგენს ეროვნული ბანკის დანაპირებს მონეტარული პოლიტიკის შემდგომ გადაწყვეტილებებთან დაკავშირებით, არამედ ასახავს საორიენტაციო ტრაექტორიას იმ დაშვებით, რომ ეგზოგენური ფაქტორები პროგნოზში გათვალისწინებული მიმართულებით განვითარდება.

„აღნიშნული პროგნოზები დამოკიდებულია ეგზოგენურ ფაქტორებზე და შეიცავს რისკებს როგორც ზრდის, ასევე შემცირების მიმართულებით. საგარეო ფაქტორების მხრივ, მნიშვნელოვანია ეკონომიკური ვითარება სავაჭრო პარტნიორ ქვეყნებში, დოლარისა და ევროს გლობალური ტენდენციები, სურსათისა და ნავთობის საერთაშორისო ფასები. შიდა ფაქტორების მხრივ, მაკროეკონომიკურ პროგნოზებზე მნიშვნელოვან გავლენას ახდენს ფისკალური დეფიციტი, საკრედიტო აქტივობა და ბიზნეს განწყობა. შესაბამისად, თუკი საგარეო ფაქტორები ან/და შიდა ფაქტორები მოსალოდნელისგან განსხვავებული იქნება, ეს გავლენას მოახდენს საპროგნოზო მაკროეკონომიკურ მაჩვენებლებსა და ეროვნული ბანკის მომავალ გადაწყვეტილებებზე“,-აღნიშნულია ეროვნული ბანკის ანგარიშში.